إلى ابنه حيدر : كاظم اسماعيل الكاطع ##

حيدر
الا يقلقك ضجيج العربات على
سكك المنايا ؟
انت اصغر المسافرين سنا ..
فكيف فتح لك قطار الموت ابوابه ؟
وداعا ولدي
وداعا حيدركاظم اسماعيل
بغداد 1997
********



بدى العام الدراسي وبدت لهموم
وبيتي عل مدارس بابه صاير
نسيت وداعتك اشتري هدوم
الك .. ومحضر اقلام ودفاتر
موتسمع قيام وليش متكوم ؟؟
****
ومراسمك ولا من كال حاضر
الشمس طلعت علينه مو وكت نوم
وهم عدكم صبح يااهل المكابر ؟؟
**
وهم عدكم ضوه وشباج وانجوم ؟؟
وهم ينطونكم واجب الباجر ؟؟
الوالد بالوداع يصير مهموم
وانه ثنينهن والد وشاعر
اذا عشرين يوم وماشفت نوم
شيظل بالحيل بالعشره الاواخر ؟
***
فراش الفاتحه لو شفته ملموم
بنص كلوبنه تلكه الجوادر
يمنه المصبغه او ودينه لهدوم
الحزنك مشترينه قماش حاضر
تمنيتك جرح كلساع ملجوم
وتبات الليل بشفاف الخناجر
لمت الروح بس شفادني اللوم
شلحَك؟
وبسفينه الموت عابر
ستر الله نغط بديارنه البوم
اخذ عين الكلاده وراح طاير
اهن كاسين بيهن كاس مسموم
اخاف اغلط وبالمسموم اكاسر
بعنه البيت ريت البيت مهجوم
وريت اكثر بعد من هل خساير
تحب انته اللعب والكَبر ملموم
شلون تحملت وشلون صابر ؟
***
وليش يابوي من الهوى محروم ؟؟
ونسمات الهوى اطيب الخاطر
من هو ؟
شوفك صورة المعدوم ؟
وليش تعلكت يا شاب قاصر ؟
****
ماضنبت زرعي يروح فد يوم
وعصافير الحزن تكضي البيادر
من اكتب قصيده تزيد الغيوم
ومن عيني الدمع يملي الدفاتر